Азамат Оразбек: «Спорт - менің екінші өмірім»

- Отбасыңыз туралы айтыңызшы, ата-анаңыз, бауырларыңыз және әйеліңіз кім? Неше балаңыз бар?

-Үйде үш ағайындымыз. Менен кейін інім мен бір қарындасым бар. Анам менің қолымда тұрады, үйіміздің гүлі. Әйелімнің аты Ажар, Аягөз өңірінің тумасы. Үш баламыз бар – екі қыз, бір ұл. Сондықтан, мен бақыттымын.

- Он екі мүшесі сау кейбір адамдардың өзі «қолымнан түк келмейді» деп «жылай береді». Сіз тіршілікке қалай бейімделдіңіз? Қазіргі зор еңбегіңізді емес, қарапайым дүниелерді, мысалы, тамақ ішіп, киінуді кім үйретті? Бірден өзіңіз тамақ ішіп, өзіңіз киініп кеттіңіз ба? 

- Мен өмірге әбден бейімделгенмін. Тамақты өзім іше аламын, өзім киініп, шешіне аламын. Тек түйме түймелей алмаймын, белбеу тағуда аздап қиналатыным бар. Ал, басқасының бәрін үйренгемін, киім киюден, болмаса, тамақ ішуден қиналып көрмеппін. Жасырмаймын, екі қолымнан айырылған кезде, басында әрине, қиын болды. Анамның берген тамағын жеп жүрдім. Кейін «неге мен тамақты өзім ішіп, талпынып көрмеймін» деген ой келді. Тырыстым, көп тырыса келе, үйреніп кеттім. Көбіне қиналғанымды көрсеткім келмейді. Менің тамақ ішіп отырғаным айналадағы адамдарға ерсі көрінуі мүмкін, кейде маған көмектескілері келіп кетеді. Бірақ, мен өзім істеп үйреніп қалғанмын, ондай адамдарға «көмектеспеңіздер» деймін. Ашығын айтқанда, біреудің маған көмектескенін, «Азамат, істеп берейін» дегенін жаным сүймейді. Бәрін өзім істегім келеді. Егер қандай да бір дүние мүлде қолымнан келмей, қиналып жатсам, өзім көмек сұраймын.

-Протез киесіз бе? Егер протезіңіз жоқ болса, оны алып салдыруды ойлап жүрген жоқсыз ба?

- Мен протез кигемін кезінде. Үлкен демеушілердің қолдауымен Ресейден арнайы жасатып алдырған протезім болған. Өкінішке қарай, мен протезге үйрене алмадым деуге болады, сондықтан, қазір протезсіз жүремін. Себебін ашып айтам, протез кигенмен мен бәрі бір оның көмегімен ештеме істей алмаймын. Протез кисем, өзіңіз айтып отырған киіну, тамақтану сияқты қызметтерді өздігімнен істей алмай қаламын.

- Болашағыңызды осылай әр саламен байланыстырғыңыз келе ме әлде тұрақты әрі көп табыс көзіне айналдырғыңыз келетін жұмыс бар ма?

- Тұрақты жұмысым жоқ, айтқанымдай, уақытымның көбі спортқа кетеді. Жаттығу бар, жарыстар бар. Ал, бірақ, жұмыс іздесем, өздеріңіз сияқты журналист болғым келіп жүр. Соңғы кезде өзімді журналистика саласынан көргім келіп жүр. Неге шоу немесе бағдарлама жүргізіп байқамасқа? Меніңше, қолымнан келеді.

- Жаңа қазіргі жетістіктеріңіз деп бекер айтқан жоқпын. Білуімше, ән айтасыз, той жүргізесіз, теннис ойнайсыз. Осылардың әрқайсысын қайдан және қалай үйреніп жүрсіз? Көбіне шоу-бизнес жақын ба әлде спортты таңдайсыз ба?

- Көп адам «жан-жақтысың, қалай үлгеріп жүрсің» деп, таң қалатыны рас. Иә, мен ән айтамын. Бір айта кетерлігі, теннистен бөлек, суда жүзе аламын. Суда жүзуден халықаралық спорт шеберімін, үстел теннисінің спорт шеберімін. Егер «шоу-бизнес пе әлде спорт па?» деп таңдау қойса, мен міндетті түрде спортты таңдаймын. Ән айту – бала күнімнің арманы еді. Үлкен сахнаны армандадым.

Дегенмен, өмірімдегі осы дүниелердің бәрі өз орнымен, өз кезегімен келіп жатқандай. Еш өкініш жоқ. Қазір репертуарымда он алтыға жуық ән бар екен. Ал, спорттан ешқашан алыстаған емеспін. Спорт – менің екінші өмірім.