Эльмира Мусина – батыр ана, кәсіпкер әйел келбеті

2021 жылдың қантар айынан бастап, «Рамазан» қайырымдылық дүкені жұмысын бастады. Қоғамдық жұмысқа бір қызметкер алынды. Тізім бойынша 65 отбасын тегін киім-кешекпен қамтамасыз етіп келеді. «Қайырымды істер марафоны» аясында аз қамтылған, көпбалалы он отбасыны азық - түлікпен қамтамасыз етті. Сонымен қатар волонтерлік жұмысын да жалғастырып келеді. 2021 жылы сәуір айында 9 балалы отбасыға «Асар Үме» қайырымдылық қорымен бірге ұйымдасып, көпбалалы отбасыға пәтер сыйладық. Мектеп оқушыларының бос уақытын тиімді пайдалану мақсатында О.Саргунанов атындағы мектептің ауласына «Табиғатты аялайық» атты акция аясында 20 түп ағаш отырғыздық. 

- Кәсіпкерлік пен отбасын бірге қатар алып жүрудің қыры мен сыры жайында айтып берсеңіз?

- Барлық іс-әрекет адамның өзіне байланысты. Қазір көпбалалы аналар арасында дау-дамай көп. Олар кәсіпкер болмай-ақ, үй тірлігіне үлгере алмай жатыр. Соған қарап ойлаймын, кәсіппен айналыспай үйде отырған адамның ештеңеге үлгермеуі мүмкін емес. Баламен отырған әйел үй шаруасын келістірмесе, ол отбасындағы адамдардың да жағдайын жасап үлгермейді. Баланың тәрбиесі де жайына қалады. Барлығына уақыт табу адамның өзіне байланысты. Жоспарлы түрде жасаса, барлығына үлгеруге болады. Кәсіпкерлікті де, отбасыны да қатар алып жүрген әйел-азаматшалар аз емес. Отбасыңнан бөлек, қоғамға қажет екеніңді сезіну – шын бақыт. 

Өзім бала тәрбиесіне де үлгеріп, қоғамдық жұмыстарды да қатар алып жүрмін. Ақшаның соңына түсіп, отбасымды екінші орынға қойған емеспін. Жеті баланы дүниеге әкелген «Батыр ана» атандым. Балаларым қатарының алды болып, білім жолындағы жетістіктерімен қуантып жүр. 

Тұңғыш қызым Гауһар Ақтөбе қаласында медицина саласында білім алады. Ұлым Темірлан – қобызшы, Д.Нұрпейісова атындағы колледжде, музыка саласын таңдады. Ауданға белгілі Қорқыт атасының ізін жалғастырушы жалғыз өнерпаз. Екінші ұлым Батырлан ағылшын тілін жетік меңгерген, АРЕК технологиялық колледжінің студенті. Одан кейін Ерасыл – Кадет сыныбының озат оқушысы. Әділжан – спорт шебері, қазақ күресінің әртүрлі сайыс жеңімпазы. Тәңірден туабітті ораторлық қасиеті бар ерекше ұлым. Әдебиетке жақын, Абайдың қара сөздерін жатқа оқиды. Елімізге белгілі тұлғалардың шығармаларын жақсы көреді. Үйдің кенжесі әрі еркеміз Райана 2 жасқа толды. Балаларымның жетістігі – кәсіп пен отбасыны қатар алып жүргеннің айқын көрінісі.    

- Қазақ қыздарының іскерлік қабілеті, қоғамда өзін-өзі таныта білуі қаншалықты жолға қойылған? Әдетте, «қыз ошақ басында ғана отыруы керек» деген түсінік бар ғой. 

- Жүрген жерімде қазақ қыздарының батыр екенін айтып жүремін. Мені алаңдататын жайт – жастардың өз-өзіне сенімі аз. Өмір сүруге, іс бастауға ешқандай жігерленбейді. Оларда мотивация жоқ. Жастардан бөлек орта буындағы адамдар да өздеріне сенбейді. Өздері сенбесе түсінікті, балаларын да сенімсіз болуға тәрбиелейді. Баласы бір жердегі тренингке қатысамын десе, ата-анасы, «Ол жақта не бар, қатыспай-ақ қой, әшейін ақша жасау» деп негатив пікір айтып, баласын қолдамайды. Үкіметтің біркелкі жұмысына үйреніп қалған. Тұрақты жұмыс істеп ай сайын айлық алып отыруға дағдыланған. Бұл масылдық дертіне шалдықтырады. Ал өзі кәсіппен айналысса, өзіне 24 сағат жұмыс істейді. Қаншалықты жұмыс істеп тер төксең, соншалықты кәсібің артады. Бірақ ақша да соңына түспей, барлығын өз деңгейінде тепе-теңдікте ұстауға болады. 

Қазақ менталитетінде әйел адам ошақ басында ғана отыруы керек деген түсінікті жоққа шығара алмаймыз. Десек те, «әйел бір қолымен бесікті, екінші қолымен әлемді тербетеді» деген сөзді де естен шығармаған жөн. Қазір осы бір қанатты сөзді өмірлік тәжірибеме жиі қолданыппын. Адамға құлшыныс беретін терең мағыналы сөз екеніне көзім жетті. Жаугершілік заманда да ері жауға кеткенде бала-шағасына қамқор болып, шаңырағының түтінін түтетіп отырған. Қазіргі жастарға кеңесім – тек қана өзіне сену. Іскерлігі мен білімі  сенімді серігі болу керек. Мақсаты айқын, жоспары жүйелі болса алынбайтын қамал жоқ. 

Одан кейін отбасында ер адамның қолдауы – үлкен көмек. Жолдасым жанымды түсінетін азамат. Жоғары деңгейде инженер-механик. «КазТрансОйл» мекемесінде жұмыс істейді. Мұнайшының немересімін, мұнайшының кызымын, келінімін, жарымын. 110 жылдық тарихы бар мұнайлы мекенде тұрамын. Атам Мусин Тельман – Губкин институтын аяқтап, берекелі қара алтынды өңірде еңбек еткен мұнайшы. Енем Аккерік Карабалина – зейнеткер ұстаз. Ол да 8 балалы дүниеге әкелген, алтын құрсақты батыр ана. Өзім төрт ағайындымыз. Ағам, мен, інім, сіңлім. Бәрі де бір-бір саланың білікті мамандары, ауданымыздың абыройлы азаматтары.  

- Сіз үшін кәсіпкер және жеке адам ретіндегі ең маңызды қасиеттер қандай? 

- Адам ретіндегі ең маңызды қасиет – адами құндылықтарды жоғалтпау. Бұл қасиетке көп нәрсе жатады. Өзімнің бойымдағы адами қасиеттерді жіпке тізсем, ең алдымен адамгершілік қасиетімнен айырылып қалудан қорқамын. Ата-бабаларымыз, көркем мінезділікті бекер айтпаған болуы керек. Мінезің көркем болса, кез келген жерде сыйың артады. Көпшілік алдына шығып, «Мен» деп көкірек керсең де, болмайды. Өзімнің бойымда да «Мен» деген қасиеттің жоғын байқаймын. Осы күнге дейін барлық адамның қолынан келетін дүниені жасадым. Кәсіпкер болып, іс бастағысы келетін адам ниетін дұрыстаса болды, әрі қарай көркем мінез, адамгершілік қасиет көмекке келмек.  

- Алға қойған арман-тілектеріңіз жайында айтып берсеңіз?

- Арман таусылған емес. Өзім де көпбалалы ана болғасын, балаларымның білім алуына және дамуына көп көңіл бөлемін. Болашақ – жастар қолында. Мемлекет тарапынан да жастарға бағыт-бағдар беріліп, қолдау көрсетіліп жатыр. Бірақ соны жүзеге асырып жатқан жастар қатары сирек. Менің байқағаным, қазіргі жастарда ізденіс жоқ. Талапты, еңбекқор, елге көмегі тиетін жастар аз екенін мойындау керек. Балаларымды еліміздің білікті азаматы ретінде тәрбиелегім келеді. Қазірден-ақ балаларым шетелде оқығысы келеді. Сол кезде менің айтарым, «Шетелде оқып келіп, ауылды көркейтуге көмектесесіңдер. Сендердің арқаларыңда ауылымыз дамып, өркендейді» десем, бәрі бүгін-ертең келетіндей шошып кетеді. Шетелде оқып келіп, ауылда жүргіміз келмейді. Өзіңіз дамыта беріңіз» деп жауапкершілікті маған жүктеп жатыр. 

Оларға ауылдың ақысы бар екенін түсіндіремін. Кіндік қанын тамған жерді көркейту – адамдық борышың. Жастарға артатын үміт көп. Менде дүние қуған арман жоқ екен. Кентіміздің еріктілер мүшесінде болғандықтан, ауылымыздың инклюзив және мүгедектігі бар балалармен жұмыс істеуді жоспарлап отырмын. Республиканың барлық өңірінде, қалаларында «Ремесленно» шеберлік мектебін ашқым келеді. Қоғамдық іс-шараларға жиі қатысамын. «Атамекен» палатасы түлегімін, «Әйелдер микробизнесте» жобасының қатысушысымын. Қилы тағдыр кімнің басына өз ауыртпалығын түсірмеген, ауылымызда жүрген әлеуметтік аз қамтылған аналарымызға, отбасыларға үй алуға ұмтылдырып, мүмкіндіктер жасап, кәсіпке баулып, көмектессем бе деген ниетім бар. Алдағы уақытта, өз кезегін күтіп жатқан жоспар да көп.