Данияр Қалдыбаев: «Айлыққа ғана қарап отыра алмадым...» 

— Ал енді сіздің әлеуметтік желідегі белсенділігіңізге келсек. Әсіресе, фейсбук парақшасында жиі жазба жариялап тұрасыз. Байқағаным "мажор", яғни қалаталы қазақтың амплуасын алып жүрсіз. Бұл не үшін керек? 

— Әлеуметтік желіде жазба жариялау — хоббиім. Белгілі бір діттегенім жоқ. Бірақ фейсбуктегі жазбаларым арқылы адамдардың көңілін көтеріп, өзім де серпіліп қалам. Бір жағынан түрлі жаңа таныстықтар осы әлеуметтік желінің арқасы. 

—  Жазбаларыңызда саяси сын да байқалады, еліміздегі кейбір қоғамдық қайшылықтарды шымшып алатыныңыз тағы бар. Бұл кәсібіңізге кері әсер етеді деп қорықпайсыз ба? 

— Қорқатын ешнәрсесі жоқ деп ойлаймын. Мен өз азаматтық позициямды ғана білдіремін. Меніңше, жақсыны жақсы, жаманды жаман деу керек. Рас, әлдебіреулер әлеуметтік желідегі жазбасы үшін қамалды дегенді естіп жатамыз. Бірақ пікір білдіргеннің еш артық-кемі жоқ. 

БИЗНЕС АШАМЫН ДЕГЕНДЕРГЕ ҮШ КЕҢЕС

— Кәсібіңізді жарнамалауға қаншалықты көңіл бөлесіз? Ол үшін көбіне қайда жүгінесіз теле-радиоға ма әлде интернетке ме? 

— Теле-радиоға жарнама беріп көрмеппіз. Телевизиялық жарнаманың құны қымбат әрі әсері бар деп естідік. Негізінен жарнамада интернетке, оның ішінде әлеуметтік желілерге иек артамыз. 

— Қазір тез байып кету жолын ұсынғыш, бизнеске баулығыш тренинг, кітаптар өте көп. Солардың пайдасы бар ма? Өзіңіз сондай мотиваторларға жүгініп көрдіңіз бе? 

— Бірнеше тренингке бардым. Айтарым, тренингке бара сала бизнесмен болып шыға келмейсің. Мотивация береді. Бірақ сол жігерлендіруге өзің сенуің керек. Тренингке бармас бұрын, барғандардың пікіріне сүйенген жөн, әсіресе  тәжәрибелі бизнесмендердің сілтемесімен таңдау жасасаң ұтылмайсың. 

— Әлбетте, бизнес қомақты кіріс көзін табу екені белгілі. Одан бөлек, бизнес деген сіз үшін не? 

— Біріншіден, пайда көзі. Екіншіден, отбасыңның ештеңеден таршылық көрмеуінің кепілі, бастысы балаңның болашағына құйылатын инвестиция. Үшіншіден, мықты бизнес — мықты мемлекет. Себебі, адамдарды жұмыспен қамтисың, айлық, салық төлейсің. 

— Әлеуметтік желіге оралсақ. Бір жазбаңызда" Қазақстан халқына " қорына 2 мың теңге салып, тіпті оны президенттің жеке өзіне аударған электронды түбіртекті жарияладыңыз, оны әзіл  деп түсіндік. Сұрайын дегенім, қайырымдылық жасап тұрасыз ба? 

— Жақсы сұрақ. Өз басым жариялы түрде жақсылық жасағанды құптамаймын. Ал адамды қайырымдылық жаса деп мәжбүрлеу әбестік. Ондай шаруаға адам өзі келеді. Себебі қайырымдылықты екінің бірі жасай алмайды. Ол үшін ішкі дүниеңдегі тазалық қажет. Рас, бірталай адамға көмектескенім бар. Бірақ,«міне, мен бәлен дегенге демеу болдым»,— деп жар салу біртүрлі тұрпайы көрінеді мен үшін. Жақсылық жасағаныңды айтқан да дұрыс шығар, бұл ретте әркімнің пікірі әртүрлі. 

—  Бизнес ашамын деген азаматқа берер үш негізгі кеңесіңіз? 

— Ең басты қағида қорықпау керек. Себебі болар іс болады, екінің бірі кәсіпкер болып кете бермейді, сол үшін бастап көрген жөн. Екіншіден, егер алғаш рет іс ашқалы жатсаңыз несие алмаңыз. Егер ісіңіз тоқырап қалса, банкке берешектен құтыла алмай, туыстардың ақшасын қайтара алмай тығырыққа тірелу қаупі бар. Өз жинаған қаржыңызды жаратқан жөн. Үшіншіден, адамдармен жиі араласыңыз, кісікиік болмау керек. Жаңа таныс — жаңа бизнес идея немесе қосымша мүмкіндік болуы мүмкін.